Засгийн газрын хуралдаан өнөөдөр уламжлал ёсоор болж, нэр бүхий 13 асуудлыг хэлэлцэж, зургаан асуудлын талаар танилцуулга явуулсан байна. Бичил уурхайгаас ашигт малтмал олборлогчдын асуудлыг зохицуулах зорилгоор хэд хэдэн хуулийн шинэчилсэн төслийг хэлэлцэж УИХ-д өргөн мэдүүлэх, Эрчим хүчний зохицуулах газрын Зохицуулагчдын зөвлөлийн дарга Гаанжуурыг үүрэгт ажлаас нь чөлөөлөн Шүүхийн шийдвэр гүйцэтгэх ерөнхий газрын даргын албыг эзэнтэй болгосон зэрэг хэд хэдэн шийдвэр гаргажээ.

Нийгмийн хамгаалал, хөдөлмөрийн яамнаас шинэчлэн боловсруулсан Нийгмийн халамжийн тухай хуулийн төслийг энэ лхагва гаригт УИХ-ын холбогдох байнгын хороо хэлэлцлээ. Хавтгайрсан халамжийн бодлогыг үндсээр нь өөрчлөх хэмжээнд шинэчилнэ гэж найдаж байсан ч харин эсрэгээрээ халамжид олгох зарлагыг 100 тэрбум төгрөгөөр нэмэгдүүлсэн зэрэг хэд хэдэн үндэслэлээр шүүмжилсэн. Гэсэн хэдий ч хуралдааны эцэст гишүүдийн олонх нь дэмжиж, тус хуулийн төсөлд ажлын хэсэг томилжээ.

Долоо хоногийн эхний өдөр “7-р сарын 1 ” нээлттэй сонсгол болох тухай зар хэвлэлийнхэнд хүрсэн. Гэвч тодорхойгүй шалтгаанаар хойшлогдон Лхагва гарагт болно гэсэн ч өчигдөр мөн л болсонгүй.

Ард түмний санал  асуулга явуулахыг шаардан өлсгөлөн зарласан 7 хүн өнөөдөр өдрийн 13 цагт өлсгөлөнгөө зогсоосноо албан ёсоор зарлалаа.

Их хурлыг тараах эсэх асуудлаар бүх нийтийн санал асуулга явуулахыг шаардаад байгаа иргэний хөдөлгөөнийхөн өлсгөлөн зарлаад 13 хонож байна. Өлсгөлөн зарлагчдыг хүчээр тараан,дүүргүүдийн эмнэлгүүдэд хэвтүүлээд байгаа юм.NTV ньюс мэдээллийн хөтөлбөр  тэдний биеийн байдал ямар байгаа талаар тодрууллаа.