Өнөөдөр Олон улсын музейн өдөр. Үүний хүрээнд Үндэсний түүхийн музейд “Эх түүх, эх соёл ”арга хэмжээний нээлт болж “Үндэсний музейн түүх” гэрэл зургийн үзэсгэлэн гарч байна.Харин байгалийн түүхийн музейд 14.00 цагаас “ Цэцэгчний дурсамж” уулзалт, тасалгааны цэцгийн үзэсгэлэн, Чойжин ламын сүм музейд “ Чойжин сүмийн барилга “ сэдэвт уулзалт ярилцлага болно. Мөн Театрын музейд 16.00 цагаас  “Музейн өнгөрсөн ба одоо” бэсрэг үзэсгэлэн гарах бол  Монголын уран зургийн галерейд 10.00-17.00 цагийн хооронд “Хөөмөл, ардын гар урлал”-ын үзэсгэлэн гарч байна.

Өнөөдрийн байдлаар улсын хэмжээнд 14 түймэр асч, зургаан түймэр цурманд байна. Тайгад түймэр гарснаас машин, техник явах боломжгүйд хүргэж, гал сөнөөгчид, нутгийн иргэд 10-20 км газар алхаж байж түймрийн захад хүрч байгаа аж. Мөн салхи ихтэй, чиглэл нь байнга өөрчлөгдөж байгаагаас түймэр унтраахад хүндрэл учирчээ.

Нийслэлийн Сонгинохайрхан дүүргийн 21 дүгээр хороо, Жаргалант тосгон, Тарвагатайн аманд энэ жил 1050 ажилгүй иргэн төмс, хүнсний ногоо тариалах ажил маргааш эхэлнэ.Нийслэлийн Засаг даргын санаачлагаар өнгөрсөн жил ажилгүй 800 иргэнийг бүлгийн зохион байгуулалтад оруулж газар тариалан эрхлүүлсэн юм. Тэд өнгөрсөн жил тариалалтын газартаа 100 тонн үрийн төмс суулган 500 гаруй тонн төмс хураан авч, 50 тонн төмсийг энэ жилийн тариалалтад  зориулан хадгалсан аж. Мөн ХХАААҮЯ-наас зохион байгуулдаг Намрын ногоон өдрүүд үзэсгэлэнд оролцон  нэг  кг төмсөө 350-400 төгрөгөөр борлуулан ажил амьдралдаа нэмэрлэжээ.

“Монгол эгшиглэн”  хамтлаг Олон улсын хүүхдийн өдрийг тохиолдуулан “Хүүхдийн төлөө за гэж хэлье” уриан дор зохион байгуулагдах “Бид монгол хүүхдүүд-2012”  нэртэй бие даасан тайлан тоглолтоо  хийнэ. Ерөнхийлөгчийн ивээл дор болж буй уг тоглолт энэ сарын 31-ний өдөр Монгол бөхийн өргөөнд 16.00 цагаас болох юм байна.

Энэ талаархи дэлгэрэнгүй мэдээллийг “Монгол ньюс” мэдээллийн танхимд өнөөдөр 11.00 цагаас хийх аж.

Дашрамд дуулгахад, “Монгол эгшиглэн” хамтлаг  тоглолтоос орсон  орлогоосоо  Эх хүүхдийн эрүүл мэндийн үндэсний төвийн мэс заслын тасгийн эрчимт эмчилгээний өрөөг шинээр тохижуулах, шаардлагатай тоног төхөөрөмжийг суурилуулахад хандив өргөх  гэнэ.

“Бид Монгол Хүүхдүүд-2012” тоглолтын ерөнхий санаачлагчаар “Эгшгийн учиг” ТББ,  ерөнхий зохион байгуулагчаар “Монголын урлагийн залуучуудын холбоо”, хамтран зохион байгуулагчаар www.urlag.mn www.zaluu.com  зэрэг сайтууд ажиллана.

Түүнчлэн  ерөнхий ивээн тэтгэгчээр Ерөнхийлөгчийн тамгын газар, ивээн тэтгэгчээр ШУТИС , Улаанбаатар хот дахь Польтехникын коллеж, Сэлэнгэ  пресс ХХК оролцох аж.